సినిమాలో ఆయన కూడా ఉన్నాడు.. కానీ ఎడిటింగ్‌లో తీసేశాం.. ఆడియన్స్‌కు షాక్ ఇచ్చిన అనిల్ రావిపూడి

సినిమాలో ఆయన కూడా ఉన్నాడు.. కానీ ఎడిటింగ్‌లో తీసేశాం.. ఆడియన్స్‌కు షాక్ ఇచ్చిన అనిల్ రావిపూడి

మెగాస్టార్ చిరంజీవి హీరోగా, హిట్ మెషిన్ అనిల్ రావిపూడి దర్శకత్వంలో తెరకెక్కిన మన శంకర వర ప్రసాద్ గారు టాలీవుడ్‌లో భారీ విజయాన్ని అందుకుంది.
విక్టరీ వెంకటేష్ కీలక పాత్రలో అలరించిన ఈ చిత్రం, సంక్రాంతి కానుకగా విడుదలై ప్రేక్షకుల నుంచి మంచి స్పందన దక్కించుకుంది.
షైన్ స్క్రీన్స్, గోల్డ్ బాక్స్ ఎంటర్‌టైన్‌మెంట్స్ బ్యానర్లపై సాహు గారపాటి, సుస్మిత కొణిదెల ఈ సినిమాను నిర్మించారు. నయనతార కథానాయికగా నటించగా, శ్రీమతి అర్చన చిత్రాన్ని ప్రజెంట్ చేశారు.

థియేటర్లలో విడుదలైనప్పటి నుంచి ఈ సినిమా కలెక్షన్ల పరంగా దూసుకుపోయింది.
సుమారు రూ.400 కోట్లకు పైగా గ్రాస్ వసూల్ చేసి ఇండస్ట్రీలో కొత్త రికార్డులు నమోదు చేసింది.
మెగాస్టార్ చిరంజీవి వింటేజ్ లుక్, టైమింగ్ కామెడీ ప్రేక్షకులను విశేషంగా ఆకట్టుకున్నాయి.
అదే సమయంలో విక్టరీ వెంకటేష్ పాత్రకు వచ్చిన స్పందన కూడా సినిమాకు అదనపు బలంగా మారింది.

ఈ సినిమా విజయం సాధించడంతో అనిల్ రావిపూడి క్రేజ్ మరింత పెరిగింది.
ఇటీవల ఒక ఇంటర్వ్యూలో ఆయన ఈ సినిమాకు సంబంధించిన ఆసక్తికర విషయాలను బయటపెట్టారు.
చిరంజీవి లాంటి స్టార్ హీరో కోసం కథ రాస్తున్నప్పుడు పూర్తి అభిమానం, గౌరవం ఉండాలని, అప్పుడే కథ సహజంగా పండుతుందని ఆయన తెలిపారు.

హీరో ఎంట్రీ విషయంలోనూ అనిల్ రావిపూడి ప్రత్యేకంగా ఆలోచించారని చెప్పారు.
మొదట్లో యాక్షన్ సీన్‌తో ఓపెనింగ్ ఇవ్వాలనే ఆలోచన తనకు లేదని వెల్లడించారు.
నేషనల్ సెక్యూరిటీ అడ్వైజర్ పాత్రకు యాక్షన్ ఓపెనింగ్ సాధారణంగా ఉంటుందని, దానిని బ్రేక్ చేస్తూ ఒక సాధారణ మనిషిగా, విడాకులు తీసుకున్న భర్తగా వరప్రసాద్ రోజువారీ జీవితాన్ని చూపించాలని భావించినట్టు తెలిపారు.
ఆ తర్వాతే మెల్లగా చిరంజీవి మాస్ యాంగిల్, హీరోయిజాన్ని ఎలివేట్ చేశామని అనిల్ చెప్పారు.

ఇదిలా ఉండగా, ఈ సినిమాలో ఒక ముఖ్యమైన ఎపిసోడ్‌ను ఎడిటింగ్ దశలో తొలగించినట్లు అనిల్ రావిపూడి వెల్లడించారు.
ఆ ఎపిసోడ్‌లో VTV గణేష్ నటించారని చెప్పారు.
రాసినప్పుడు, షూట్ చేసినప్పుడు ఆ సీన్ బాగానే అనిపించిందని, కానీ ఎడిటింగ్‌లో చూసినప్పుడు కథా ప్రవాహాన్ని డిస్టర్బ్ చేస్తోందని అనిపించిందని తెలిపారు.

సుమారు 6 నుంచి 7 నిమిషాల నిడివి ఉన్న ఆ సన్నివేశాన్ని తొలగించడం వల్ల సినిమాకు మరింత వేగం వచ్చిందని అనిల్ పేర్కొన్నారు.
ఈ నిర్ణయంపై చిరంజీవి కూడా ఒక్క మాటే అన్నారని, కథకు అవసరమైతే ఎడిటింగ్‌లో కట్ చేయడంలో ఎలాంటి సందేహం లేదని మెగాస్టార్ పూర్తిగా సహకరించారని చెప్పారు.

మొత్తం షూటింగ్ అనుభవం గురించి మాట్లాడుతూ…
ఈ సినిమా షూటింగ్ అంతా ఎంతో సజావుగా జరిగిందని, ప్రతి రోజు ఒక పండగలా అనిపించిందని అనిల్ రావిపూడి చెప్పారు.
చిరంజీవి సెట్‌లో ఉండటం వల్ల టీమ్ అంతా ఎనర్జీగా పనిచేసిందని, అదే ఫీల్ సినిమాలో కూడా కనిపించిందని అన్నారు.

బ్లాక్ బస్టర్ విజయంతో చిత్రయూనిట్‌తో పాటు మెగా అభిమానులు కూడా సంబరాల్లో మునిగిపోయారు.
కంటెంట్, కామెడీ, ఎమోషన్ అన్నింటిని బ్యాలెన్స్ చేస్తూ తెరకెక్కిన ఈ సినిమా టాలీవుడ్‌లో మరో గుర్తుండిపోయే హిట్‌గా నిలిచింది.